最近淘寶有一款非常流行嘅「水晶泥」自製玩具，風靡兩岸三地嘅中小學生。呢種「水晶泥」喺香港稱為「鬼口水」或者「核突膠」，質感「滑潺潺」似啫喱；玩家可以因應個人喜好，加減材料、調校顏色，造成獨一無二嘅「鬼口水」。不過，好多產品材料當中都包含有毒嘅硼砂，隨時令小朋友急性中毒，甚至致命。
{adv here}
有家長大呻，子女沉迷自製「鬼口水」，更指有小朋友喺學校曾經誤以為係零食吞咗落肚。專家指出，硼砂可以導致急性中毒，小朋友玩鬼口水時，如果皮膚有破損，或者期間用手掂到口腔，硼砂就會被人體迅速吸收，甚至導致急性中毒，症狀包括嘔、肚瀉、皮膚出現紅斑等，嚴重更會致命。
有報道指，廣州有一對姊弟，3月12日唔小心用咗裝過硼砂水嘅杯，結果出現嚴重嘔吐。江蘇宿遷亦發生過同類型個案，情況已經引起有關部門關注。
{adv here}
其實工業用同食用嘅硼砂基本上係同一種化合物，雖然硼砂毒性唔強，但根據世衞建議，食1克硼砂就可以中毒，15克就可致命。如果大量攝取（數十至數百克）或者長期服食硼砂有可能對內臟器官造成損害。硼砂始終有毒性，小朋友玩完「鬼口水」應該用梘液徹底洗手，以免觸及口部引致不適。
資料來源：TOPick
