生兒育女對於一個家庭嚟講係一件大事，對女性嚟講就係一件天大嘅事，因為以前生BB就等於叉咗半隻腳入鬼門關。老人家揀新抱都唔會揀個太瘦嘅，反而鐘意Pat Pat比較大，因為佢地認為屁股大係好生養。畢竟當時嘅醫學冇咁發達， BB可以順利出世，母子平安已經要劏雞還神。
{adv here}
{adv here}
老人家都話屁股大嘅女人好生養或者生出嚟嘅小朋友都會比較聰明，到底係咪真呢？
婦產科醫生指出，生小朋友，盆骨形狀有好大影響。盆骨出口大、形狀寬而淺先可以令分娩更順利。女性臀部寬大，有可能係脂肪多，盆骨嘅深淺同形狀，從外觀係睇唔出嘅，所以屁股比較大或者下半身比較大嘅人，唔一定係盆骨大，反而係因為脂肪比較多，會更加容易造成妊娠高血壓、難產、胎兒過重等問題。至於臀部大就會生個聰明小朋友更加係得啖笑。
生BB係咪順利，單靠胯骨寬大係唔夠嘅，仲要睇胎兒大細、胎位同埋子宮頸開口係咪順利。仲有經常被大家忽略嘅盆腔軟組織、肌肉、結締組織嘅韌性同彈性都係主要影響嘅因素。
寶寶體型同順產有咩關係？
寶寶體型愈細，順產過程就會愈順利，一般順產3.5kg以上嘅寶寶會比較困難，如果寶寶體重超過4kg，醫生通常會建議準媽媽選擇開刀。但都有超過5kg嘅寶寶係可以順產，所以都係因人而異。
{adv here}
媽媽順產第二胎會比較快？
有過分娩經驗嘅媽媽，分娩第二胎嘅分娩時間確實會比第一胎短 (如果兩胎相隔5年以下)，但痛楚係唔會減少。除咗生第二胎嘅媽媽，身材較矮嘅準媽媽都會容易啲順產。
不適合順產嘅8種孕婦
1. 胎兒體型較大
2. 產婦盆骨狹窄
3. 第一胎係剖腹產嘅產婦
4. 產婦有婦科疾病
5. 產婦凝血異常
6. 做過子宮手術嘅產婦
7. 胎位不正
8. 胎兒其他異常情況
想順產，孕期要做咩準備？
如果準媽媽準備順產，建議懷孕期要控制好自己嘅血壓、血糖、體重、懷孕中後期可以做吓孕婦瑜伽同遊水，呢啲動作都會提升順產機率，縮短生產過程。
資料來源：尋夢新聞
