隨住時代變遷，越嚟越多雙職家庭。照顧寶寶嘅重擔唔會完全落喺一個人身上，唔再係媽媽或者爸爸一個人湊寶寶咁辛苦，取而代之嘅就係夫婦一齊照顧寶寶。
寶寶出世後，新手爸媽就會視對方為「隊友」，有好多夫婦喺生寶寶之前對照顧初生嬰兒嘅知識同埋技巧都好有限，喺「實戰」嘅時候，面對好多情況都顯得不知所措、手忙腳亂，雖然係咁，但夫婦倆人都會互相幫助。
{adv here}
{adv here}
事先將工作分配清楚
結咗婚之後如果工作分配得模糊好容易會造成摩擦，特別係有咗寶寶之後。所以，喺家事嘅責任上對於要做乜嘢、邊個做、幾時做等等，都要事先溝通清楚，避免每日都浪費時間喺呢啲事情上討價還價，令倆公婆容易發生口角。
寶寶出世之後，家務會比淨係得兩個人嘅時候多好多，建議「家務分工」可以事先傾傾，了解彼此嘅想法同埋期望，大家對整潔嘅要求係咪一致，需要唔需要適當調整，一齊去渡過忙碌期，避免當一方已經竭盡所能、超級繁忙亦冇辦法兼顧其他事情嘅時候，另外嗰方仲堅持要求，令夫婦間起爭執。
{adv here}
保留妥協嘅空間
照顧寶寶又要返工，又要做家務，如果長期想法唔一致或者成日為大家唔同嘅諗法而爭吵，夫婦之間好容易陷入一個難以溝通嘅樽頸位。其實有咗寶寶之後，夫婦之間最重要嘅唔係邊個有主導權，而係心意相通、彼此合作，如果可以有妥協嘅空間，雙方可以討論調整，就可以令大家都舒服啲。
維繫夫婦之間嘅關係
有好多新手爸媽都因為照顧小朋友而筋疲力盡，再冇心力經營大家嘅關係。建議夫婦倆人可以設定專屬對方嘅約會時間，不妨請長輩每星期或者每個月抽半日或一日嘅時間，幫忙照顧寶寶，喺夫妻獨處嘅時間入面，將注意力同埋關心都可以聚焦喺對方身上。
寶寶出世之後，雖然喺短時間內會出現好多問題，但係只要夫婦倆人願意好好面對同埋處理，相信彼此就會成為最親密嘅戰友。
資料來源：聯合新聞網
