唔知大家嘅小朋友多唔多野講呢？我家個位小姐成日都唔講野，同月齡嘅小朋友都講得多過佢><雖然我都明白小朋友發展各有快慢，但係都會想佢可以快啲講多少少，起碼可以表達到自己想要啲咩，唔使成日都炆憎或者淨係識得喊去表達～
小恩恩依加就快22m，但講野真係一般般，但呢3個月不斷train佢，22m先有啲進步。如果媽媽們都覺得小朋友講嘢比較慢，都可以試吓以下嘅方法！
{adv here}
1. 點讀筆圖書
由於我個女唔會成日肯坐定定喺度睇書，所以買點讀筆係可以令到佢個人專注啲，同時可以引佢興趣去學詞語！每當佢「點」得多，個腦會愈儲愈多，佢講識講「豬」、「班馬」都係因為本點讀圖書～
2. 親身體驗
有啲bb睇書都已經肯跟住講，但小恩恩並唔係咁易就搞得掂嘅bb，所以我係會帶佢望多啲真嘅野！例如我會帶佢去啲動物園，尖沙咀、金鐘都會有唔同嘅動物可以睇，有時佢見到啲動物喺度郁嚟郁去，佢會覺得好興奮，同埋會好容易跟住我講！好幾次「雀雀」、「貓貓」、「汪汪」都係因應見到實物面認識！
{adv here}
3. 我問你答
小朋友其實模仿能力好高，可以嘗試多啲問答嘅對話，例如「你要唔要呀？」、「好唔好？」等等，可以逼下佢答你先可以比佢，當然唔係話問一兩次，佢就會識得答啦！我都有幾次係要買爸爸或者婆婆示範，要佢哋答我，我先會比佢哋，等小朋友知道原來要回答先可以得到。初初嘅階段仲要自問自答XD
{adv here}
4. 句子篇
雖然小恩恩仲未識得答句子，但呢排我都盡量訓練要佢講「媽媽比」、「食飯飯」等句子性嘅對話，其實呢啲字眼佢都識得講，但唔知點解夾埋一齊佢就唔肯講。所以我每次都會要佢跟住我講「媽媽」、「比」，盡量拆開先，要佢講晒呢3個字先，久而久沒，佢就會完整地講到成句架喇！
後記：有時候做家長往往都會比較心急，但千祈唔好因為小朋友唔講嘢而覺得炆憎，反而引佢講多啲，俾多啲耐性同鼓勵肯定佢哋，小朋友受到正面嘅鼓勵會進步得更加快！所以唔需要心急，因為佢哋終有一日都會變得吱吱渣渣:P
Text & Photos : 90後 P牌媽咪
鍾意我嘅分享可以Like我地Facebook同IG比個支持我！會更快知道我同小恩恩既Update架！
Facebook：https://www.facebook.com/90sMummy/
Instagram: https://www.instagram.com/minarainlo/
