幼兒在街上上演大龍鳳點收科?2個Step令小朋友停止哭鬧!

Step 1:先認同小朋友

好多時人會覺得嬲,係因為自己嘅想法無法得到別人嘅認同,幼兒都唔例外。所以小朋友哭鬧時,家長要保持冷靜,應該先認同佢哋嘅想法,令佢哋覺得家長其實係理解佢點解唔開心。如果係2~4歲嘅小朋友,可能表達能力較差,因此家長要用簡單嘅「幼兒語言」來同佢哋溝通。

比如,小朋友喺玩具舖發脾氣扭計想買玩具,媽媽可以同佢講「可唔可以話俾媽媽知你點解喊呀?」「媽媽知道你好想買呢樣玩具」,「媽媽知道你買唔到會好唔開心」等。


Step 2:轉移焦點

1. 將焦點轉移到其他事物上。例如家長可以話:「好,媽媽知道你想買…咦!隔離個公園好似有好多嘢玩喎,我哋快啲過去睇吓啦。」「好,你真係想買呢個?想唔想食雪糕先,我哋而家去買吖。」呢個方法適用於年紀較小嘅幼兒。

2. 巧用轉移詞:但係、下次、不過等詞語。例如「我知你想買,但係我哋屋企唔係已經有好多玩具咩?」「好,媽媽會買,下次你數學考得好我哋再買?」「好,不過媽媽今天帶唔夠錢,下次先買好嗎?」

至於較大嘅小朋友,家長可以用正面方式回應佢,「好,我知你想買,但係媽媽知道你最懂事,我哋只會買我哋需要嘅,唔會亂洗錢。」切記要強調個「好」字。

3. 家長要稱讚停止哭鬧嘅小朋友,例如「bb好叻,唔喊喇喎」「媽媽知道你最聽話」等等。

有時爸媽需要不斷重複以上兩個步驟,先可以平息到小朋友嘅情緒。但要切記,答應咗小朋友嘅事就一定要做到,例如「下次買」等。家長要「言而有信」先可以做小朋友嘅好榜樣,得到佢哋嘅尊重。


資料來源:大紀元

相關文章