拒絕做直升機父母!3招培養小朋友獨立能力

蒙特梭利曾經講過:「教育首先要引導小朋友沿著獨立嘅道路前進。」獨立包括獨立意識同埋獨立能力。一個成功嘅人,必須具備獨立思考、抉擇、解決問題嘅能力。

3招培養小朋友獨立能力

1. 放手俾小朋友做能力所及嘅事

1-3歲嘅小朋友對大人所做嘅事都好感興趣,例如見到大人掃地,佢會爭住掃,開始想自己行樓梯等,呢啲都係小朋友開始發展獨立意識嘅表現。雖然小朋友會做得唔好,掃地會掃到周圍都係,食飯會食到一地都係,但家長都應該放手俾小朋友去嘗試,否則會漸漸形成依賴性,錯過培養小朋友獨立能力嘅最好時機。

2. 尊重小朋友嘅選擇

有好多家長會認為小朋友仲細,咩都唔識,從而將自己嘅意願強加喺小朋友身上。例如選擇興趣班時,單方面幫小朋友安排晒,唔會考慮小朋友喜歡與否。其實每位小朋友嘅個性都唔一樣,家長應該幫助小朋友發掘真正嘅興趣所在,然後鼓勵佢哋長時間投入去做自己感興趣嘅事。

3. 鼓勵小朋友自己尋找答案、解決問題

當小朋友提出問題時,家長唔好即刻講個答案出嚟,雖然立刻講出答案會比較方便,但係小朋友就會失去思考問題嘅機會,長此下去,小朋友就會變到唔識思考問題。所以,家長應該鼓勵小朋友自己去搵答案。另外,家長亦可以提出一啲引導性嘅問題俾小朋友思考下,例如講故事嘅時候,家長可以提出相應嘅問題,有助培養小朋友思考問題嘅能力。


資料來源:每日頭條

相關文章