冷血父虐待5歲女兒致死亡 再放屍體入焗爐燒毁!

烏克蘭有個殘忍嘅爸爸因為控制唔到自己嘅情緒,令女兒昏迷又唔敢送佢去醫院或者報警,最後竟然同太太諗到將個女放入焗爐焚燒!甚至喺警方搵上門嘅時候,叫囝囝著上囡囡嘅衫,企圖掩飾自己嘅罪行。

綜合外國傳媒報導,烏克蘭日托米爾城日前傳出一名50歲父親Pavel Makarchuk虐待自己5歲女兒Darina,除咗毆打之外仲多次大力推跌,導致Darina因為頭部撞到門檻而昏迷不醒,Pavel見到囡囡冇咗意識,唔敢報警驚動鄰居,同太太相議後決定將囡囡放入焗爐燒毁,毀屍滅跡。

可憐嘅Darina過去曾經生活喺寄養家庭,直至三個月前先被親生父母接返屋企,同三個哥哥一齊住,原本以為可以一家團聚,但爸爸始終改唔到暴力性格。兩夫婦將女兒嘅屍體燒毁之後,社工因為搵唔到Darina覺得可疑而報警。

警方上門搜查嘅時候,狠心父母仲叫三歲大囝囝著上囡囡嘅衫,打扮成女孩,希望營造出囡囡仲在生嘅假象混淆警方。媽媽表示,當時老公發現囡囡昏迷時,試過幫佢做人工呼吸,但最後都救唔返,所以先諗到直接將囡囡燒毁。

Pavel表示,Darina嘅燒焦骸骨已棄置咗喺河邊,但係警方進行搜索時並冇發現。Darina嘅寄養家庭知道事件之後好傷心:「一早知道佢唔會得到妥善嘅照顧,但係社工機構就認為Pavel係一位值得信賴嘅正常父母。」Pavel已經開始接受調查,預計佢會面臨15年以上嘅監禁,三名兒子已經分別被安置好。

 

資料來源:ETtoday

相關文章