11歲女童iPhone 6睇片突然著火燒穿毛氈!

美國加州一位11歲女童Kayla Ramos用蘋果手機iPhone 6睇YouTube時,突然發生爆炸,手機出現火花、隨即著火,嚇到佢即刻將電話丟到遠處,令毛氈燒到穿咗幾個窿。蘋果公司正在調查事件,而且提供咗一部新電話畀女童作為賠償。

綜合外國傳媒報導,Kayla話,當佢攞住電話睇片時,坐低冇耐就發現電話開始有火花,佢驚到即刻將電話掉到房間嘅另一邊,過咗無耐,毛氈都燒到穿咗窿,而且部iPhone都燒成焦黑,變成廢鐵。

Kayla表示,平時佢都會用iPhone 6睇片,仲會借畀細佬妹姐玩遊戲,爆炸有可能因為電話過熱所導致。佢嘅媽媽Maria Adata表示,幸好子女冇受傷,電話起火事件已經告知蘋果公司,亦按照蘋果嘅指示將電話送到服務中心。

據了解,蘋果公司已經緊急調查爆炸原因,而且提供一部新電話作為賠償,目前冇最新回應。不過iPhone爆炸嘅原因有好多種,例如用咗未經授權嘅充電線同埋售後維修,不過女童嘅日常使用都合乎規格,所以未清楚係咩原因導致。

iPhone起火事件已經唔係第一次發生,之前就有用戶將iPhone放喺枕頭底,之後過熱導致起火;上年12月有一位男子聲稱佢嘅iPhone XS Max喺褲袋突然起火。

 

資料來源:ETtoday

相關文章