《武漢肺炎》武漢肺炎有藥醫?美國治療武漢肺炎患者 用藥後一日見效

美國首宗確診嘅35歲男子使用美國生物製藥公司吉利德(Gilead)研發嘅新型實驗抗病毒藥物後,病情喺一日內明顯好轉,而且無明顯副作用。

綜合外國傳媒報導,呢名35歲男子曾經到過武漢,返美後出現咳嗽、發燒等症狀,之後被送往華盛頓州一間醫療中心嘅隔離病房接受治療。到咗入院第5日,X光檢查顯示左肺下葉有肺炎症狀,第6日開始戴氧氣罩。

眼見病情越來越嚴重,醫生決定喺入院第7日俾男子接受靜脈注射瑞德西韋(remdesivir)。第二日,患者嘅臨床症狀有所改善,可以停止供氧,除咗斷斷續續嘅咳嗽,並冇其他症狀。

根據《新英格蘭醫學雜誌》(NEJM)1月31日公布嘅病例報告,男子用藥後,病情喺一日之內出現改善,而且冇明顯副作用。該醫療中心嘅首席醫療官杰伊庫克(Jay Cook)表示,他們認為使用瑞德西韋的好處超越任何潛在風險。

事實上,吉利德係一間以製造治療C型肝炎同埋愛滋病藥物聞名嘅生物製藥公司,而瑞德西韋係先前為咗對抗伊波拉病毒所研發嘅藥物。

吉利德透過聲明表示,該藥物現階段仲未喺世界上任何地方獲得許可或批准,亦都未證實係安全有效,但現正與全球衛生部門合作,透過適當使用瑞德西韋來對抗武漢肺炎疫情。


資料來源:ETtoday

相關文章