澳門政府強調不會「封關」 歐陽瑜:先控制自己對腳,唔好出街住!

近日澳門市面上人流、車流明顯增加,多區都出現人群聚集。昨日下午所見,黑沙環、祐漢、高士德、三盞燈同埋義字街五街都有市民出沒閒談買餸。政府強調,防控疫情仍然處於關鍵時刻,呼籲市民留喺屋企,減少不必要嘅外出。

澳門社會文化司司長歐陽瑜昨日喺記者會上表示,雖然澳門已經連續9日冇新增確診個案,但仍然處於防控關鍵時刻,「如果唔繼續堅守呢道防線,可能導致疫情喺社區爆發,早前付出嘅努力就會白白浪費」。又呼籲企業透過適當安排,減少人員聚集,令防疫工作可以持續發揮作用。

歐陽瑜強調唔會「封關」,因為要保證所需物資嘅供應,亦都會同內地合作檢討出入境人流。佢指出,防疫更重在市民,「今日高士德、三盞燈、義字街到處都係人,咁點算呢?一旦有疫情發生,一到社區就唔係出入境問題,係內部問題。希望大家先控制自己對腳,唔好出街住,唔好出關住!」

經濟財政司司長李偉農喺記者會上展示3張街道人流嘅相片,顯示越來越多市民外出,公衆對防疫工作開始鬆懈。佢表示,澳門確診10宗,有3宗病例出院,目前嘅防疫成果得來不易,希望唔好功虧一簣。


資料來源:澳門日報

相關文章