17歲男學生被同學欺凌「書包淋辣椒醬」不堪壓力跳樓亡

馬來西亞一名17歲男學生駿仔(化名)轉到新學校,入學僅僅2個月就遭到同學欺凌,最後承受唔到壓力而走上絕路,選擇跳樓自殺。事後2名欺凌者來到駿仔嘅靈堂,跪地痛哭懺悔,駿仔嘅父母難掩激動情緒,怒罵欺凌者嘅父母「唔識教仔」。

根據《中國報》報導,駿仔嘅父母表示,兒子生前並冇抑鬱症,今年1月曾提及喺學校被欺凌嘅事件,第二日再問佢,駿仔話「已經解決咗」。駿仔嘅媽媽林麗雲表示,「駿仔就係咁乖咁懂事,喺學校專心努力讀書,為咗唔想令其他人擔心,將被欺凌嘅壓力都獨自承擔,冇講出來。」

2名欺凌者來到靈堂慰問時,駿仔爸爸要求佢哋跪喺棺材前懺悔,只要佢哋講出真心話,就選擇原諒佢哋。死者嘅家屬喺旁邊不時對著欺凌者怒罵,「你哋害死咗一條人命」。駿仔生前曾向老師表示,「班入面嘅同學好曳,都唔係讀書嘅」,仲想申請調班,但事後就發現駿仔最後都冇將調班申請表交畀學校。

駿仔喺學校被同學用水潑、故意拉開佢張櫈令佢跌倒、淋辣椒醬落佢書包等。母親表示,兒子曾經提及學校嘅飯堂嘅食物好好味,但最近就開始帶飯返學校食。佢好奇問兒子點解,佢回答,「因為可以慳錢又可以減肥。」

喺駿仔出事當日,佢喺社交媒體上留言,「謝謝你們,沒有你們就沒有現在的我,可是我真的撐不下去」,最後仲打咗一句,「我們來世再見」,再附上一個笑臉圖案,而家睇返真係隔外心酸。


資料來源:ETtoday

相關文章