BB燙傷點算好? 家長切忌扯開小朋友件衫睇傷勢!

BB燙傷之後,現場急救非常重要,關鍵就係時間,因為關係到傷口愈合情況。以下係具體處理方法:

第一步:迅速避開熱源。

第二步:黃金30分鐘,採取「冷療」措施。

專家表示,如果燙傷嘅面積唔大,正確嘅急救處理方法就係,喺水龍頭下用凍水持續沖洗傷口,或者將傷口浸入凍水,持續30分鐘,離開凍水之後痛楚有明顯減輕就可以。

咁樣做可以令傷口迅速同徹底散熱,令皮膚血管收縮,減少水腫,舒緩痛楚,減少水泡形成,防止形成疤痕。有啲燙傷面積細,深度較淺,經過凍水浸泡沖洗處理之後,搽啲防止感染、促進傷口痊愈嘅藥物,過幾日就會好轉,甚至唔會留低疤痕。

第三步:千祈唔好揉搓、按摩、擠壓燙傷嘅皮膚,亦唔好用毛巾擦拭,另外檢查傷勢嘅時候唔好胡亂扯低衣服,要將覆蓋傷處嘅衣服剪開,避免表皮脫落令皮膚傷得更嚴重;對於面積較大、傷勢嚴重嘅傷口,唔建議家長自己處理,需要即刻送去醫院治療。

第四步:傷口唔好用紅藥水等等有色藥液,避免影響醫生對傷口深度嘅判斷,亦唔好用牙膏、豉油等等,避免造成感染。

第五步:水泡可以喺低位用消毒過嘅針吉穿,傷口應該用消毒過嘅敷料或者乾淨衣服保護。

特別提醒:

1. 如果BB有發燒、局部劇痛、流膿,就代表傷口已經受感染,應該搵醫生處理。

2. 對於嚴重嘅燙傷,特別係頭面、頸部,因為隨時引起BB休克,應該盡快送去醫院治理。

3. 頭、面、頸部嘅輕度燙傷,經過清潔傷口搽藥之後,唔需要包紮,畀傷口同空氣接觸,可以令傷口保持乾燥,加快傷口復原。

 

資料來源:99健康網

相關文章