【夏天為大地帶來蚊蟲】 防蚊貼、防蚊手環真係work? 防蚊產品要識揀!

天氣越嚟越熱,加上成日落雨,好容易滋生蚊蟲。相信呢個時候爸爸媽媽都會出動防蚊產品,但係防蚊產品有咁多種,應該點揀好呢?今次就為大家介紹幾種嬰幼兒防蚊用品。

1. 蚊怕水

蚊怕水係公認最有效嘅驅蚊用品,而經過實驗證實有效成份只有兩種,就係DEET同Picaridin。

6個月以下嬰兒唔適合用DEET成份嘅蚊怕水,所以6個月以下嘅BB應該採用物理性防蚊方式,例如:着長袖衫、淺色衫褲、用蚊網蚊帳等等。

另一種常見成分係Picaridin,亦都係醫學上被證實有效驅除蚊蟲嘅藥物,唔單止無色無味,對皮膚亦冇刺激性,研究中發現含有Picaridin嘅蚊怕水,只要濃度有20%就可以達到八個鐘防護,可以大幅減少塗抹次數,有效防蚊。

2. 防蚊貼、防蚊手環

市面上嘅防蚊貼、防蚊手環都標榜天然植物萃取或者含有精油,原理係用蚊蟲抗拒嘅氣味達到驅蚊效果,但由於呢啲產品都冇獲得官方認證,建議配搭蚊怕水使用,但唔好過於倚賴。

3. 驅蚊器

驅蚊器嘅防蚊原理係模仿雄性問飛行時發出嘅頻率,達到驅除雌性蚊嘅效果,但係效果有待驗證,都係建議使用蚊怕水為主。

4. 電蚊香

電蚊香嘅防蚊原理係將殺蟲水(目前大多使用除蟲菊精)吸入紙片,利用熱氣散出殺蟲劑,達到殺蚊效果。雖然防蚊效果理想,但係如果唔掌握好份量,就可能釋出亞列寧、甲醛等有害物質,建議使用嘅時候可以暫時將門窗閂好,令佢發揮作用,喺進入室內前30分鐘打開門窗徹底通風,避免吸入過多化學物質。

最後提醒父母,最有效嘅防蚊就只可以透過兩種方法,一種係物理性防蚊,例如:着淺色長袖衫褲、用蚊網蚊帳等等;另一種係化學性防蚊,即係用蚊怕水產品,目前市面上容易買到而且通過認證嘅化學成份只有DEET同Picaridin,父母要搵啱產品、睇清楚標籤同埋成份,先至可以有效防蚊。

 

資料來源:元氣網

相關文章