【夏日熱辣辣】小朋友涼冷氣好易病!7招預防「冷氣病」

夏天太熱,好多家庭為咗降溫都會選擇開冷氣,但係冷氣吹得多好容易出現疾病,家長要及時幫小朋友預防患上冷氣病。以下介紹返預防冷氣病嘅方法。

如何預防冷氣病?

1. 溫度唔好太低

夏天開冷氣嘅時候溫度唔好太低,一般來講26℃~28℃就可以,天氣熱啲冷氣溫度都唔可以喺24℃以下;要注意室內外溫度唔可以相差超過5℃;冷氣凍風亦唔可以吹住小朋友身體,兒童床唔可以放喺冷氣風口。

2. 注意通風

封閉空間容易滋生病菌,所以冷氣房一定要注意通風,早晚都要開窗通風,開窗嘅時候可以打開風扇幫助室內空氣流通, BB房應該隔幾個鐘就開窗通風一次。

3. 冷氣要定期清潔

建議半個月至一個月就將冷氣嘅隔塵網拆出嚟清洗,室內空氣品質先會有保障。家長亦可以用冷氣清潔劑,自己清潔冷氣,慳錢又方便。

4. 保持空氣濕度

喺冷氣房時,人體容易失去水份,小朋友皮膚水份調節能力唔及成年人,所以要畀小朋友飲多啲水,同時增加房入面嘅空氣濕度,必要時可以用加濕器,亦可以直接喺房入面放一杯水。

5. 保護好肚同腳

小朋友肚仔如果受涼就容易引起肚瀉,所以喺冷氣房一定要幫BB保護好肚仔,同時唔好畀小朋友赤腳玩,因為腳仔受涼都會影響BB健康。

6. 避免忽冷忽熱

如果室內同室外溫差太大,要注意忽冷忽熱帶來的負面影響,小朋友喺外面活動後返到屋企唔可以即刻入冷氣房,亦唔可以直接對住冷氣風口,如果佢哋出汗,就要即刻將濕咗嘅衫更換;由冷氣房出外嘅時候要提早熄冷氣,等室內室外溫差冇咁大嘅時候先出外。

7. 早晚到戶外活動

唔好因為天氣熱就全日匿喺冷氣房唔出街,係早晚溫度較低嘅時候可以帶小朋友去戶外活動,呼吸新鮮空氣,增強體魄。

 

資料來源:GreatDaily

相關文章