《雞粉 VS 鹽》雞粉真係健康啲?製作幼兒食品應否用雞粉代替鹽?

以相同分量嘅雞粉同鹽比較,雞粉嘅鈉質的確比鹽低。不過,好多人都忽略咗一點,喺煮食過程中,雞粉嘅用量一般都比鹽多,所以添加嘅鈉質亦會較多。幼兒長期進食過多鈉質會增加日後患高血壓嘅風險,同時亦都會增加患心血管疾病嘅機會。


根據中國營養學會嘅「中國居民膳食營養素參考攝入量」建議,2至6歲幼兒每日嘅鈉質參考攝入量係650至900毫克(即少於半茶匙鹽),便可滿足其需要。其實要提升食物嘅味道有好多方法,例如使用天然香料或食物(如蔥、薑、蒜、番茄、檸檬、香橙、蘑菇等)代替鹽或雞粉調味,利用新鮮蔬果製成芡汁,如番茄汁、南瓜汁、粟米汁、菠菜汁等。

製作芡汁或烹調食物時,儘量避免選用高鹽分嘅現成醬汁或調味料。現成醬汁如咖喱汁、葡汁、照燒汁、 白汁、黑椒汁、沙嗲汁、用罐頭湯製成嘅汁料等。為咗小朋友嘅健康著想,最重要係培養佢哋嘅口味,避免偏鹹食物。

相關文章