【坐月的抉擇】長輩照顧 vs 請陪月 有咩分別?

好多人都話女人佗BB好難捱,其實坐月仲辛苦。因為產後身體虛弱,又要照顧BB,加上呢樣唔食得嗰樣唔做得,又唔出得街,簡直同坐監冇分別。再者,如果照顧坐月嘅人唔配合,產後媽媽仲會一肚氣,真係諗落都心酸。

如果想坐月坐得輕鬆自在,就要小心選擇照顧者。到底長輩照顧同請陪月員,分別有幾大呢?


長輩規矩多,周身唔自在

老一輩坐月好講究,唔可以吹風,唔可以食呢樣食嗰樣,強迫產婦狂飲上奶湯等。另外,最難頂係冇得沖涼洗頭。其實,呢啲規矩有好多都係冇必要,坐月期間只要避免俾風直吹自己,著夠衫唔好冷親,唔食辣嘢生冷嘢就可以。其實坐月期間更加要保持個人衛生,沖涼洗頭、刷牙洗面呢啲係冇問題嘅。


陪月好溝通,坐月更舒服

再嚟講下請陪月,一般來講,產後媽媽都會比較滿意。因為陪月員接受過專業培訓,同年輕媽媽嘅觀點會較為一致,產後媽媽就可以同陪月員有更好嘅溝通。陪月嘅護理方式恰當,飲食上配搭合理,衛生方面,亦唔會阻止產後媽媽沖涼洗頭,媽媽坐月嘅時候都會覺得舒服好多。

其實,長輩同陪月員最大嘅分別,就係佢哋嘅身份唔同。如果係長輩照顧,被照顧嘅媽媽就要聽話,心存感激,喺長輩面前講嘢做嘢都要好小心,覺得自己對佢哋有所虧欠。但係,請陪月嘅話自己就係被服務嘅對象,自己係客人,陪月員做服侍自己都覺得係理所當然,心入面唔會有太多顧慮。

 

資料來源:每日頭條

相關文章