點解要教小朋友自己收拾玩具？究竟有咩好處呢？自己收玩具，除咗自律同責任感之外，仲可以培養小朋友嘅「專注力」、「理解力」同「認知力」。
{adv here}
●『專注力』→ 延長小朋友對於玩具嘅注意力時間，從而加強咗小朋友嘅專注力。
●『理解力』→ 拆解收玩具嘅步驟有助於提升小朋友嘅理解力。
●『認知力』→ 喺收拾玩具嘅過程中，因著玩具嘅不同大小、顏色、形狀，而增強其認知能力。
收拾玩具係小朋友建立自律嘅第一步，亦都係培養責任感方法之一 ：「玩具係你嘅，收拾玩具係你嘅責任。」
小朋友並唔係天生就識得自己收拾玩具，應該針對唔同年齡嘅小朋友，採用唔同嘅教導方式，但概括嚟講，就係以「遊戲」嘅方式來引導小朋友學習收拾玩具。
1~2歲時
呢個時期嘅寶寶仲未有邏輯概念，唔明白點解一定要收拾玩具，呢個階段嘅寶寶，做事嘅方法係憑感覺，包括視覺、聽覺、觸覺等，亦都只有呢啲充滿感官嘅事物，先可以激發起佢哋嘅興趣，所以比起收拾玩具，你會發現，佢哋會更熱衷於將玩具周圍丟。家長可以以遊戲方式，教寶寶丟玩具，例如將玩具丟入某一個箱。
{adv here}
2~4歲時
呢個時期寶寶已經開始學習用語言去表達想法，不過你會發現，佢哋會使用負面語言多於正面語言，最鍾意講嘅說話就係「No」。不過2歲同3歲小朋友講嘅「No」其實係有分別，2歲嘅「No」，並唔代表佢真係唔想做，只係口不對心，家長們無需太在意「唔執」呢兩個字，可以自己示範點樣收拾玩具，仲要表現出情緒高昂、好開心嘅模樣，將「收拾玩具」當成係一個遊戲，從而激發起小朋友嘅興趣，佢哋就會主動走過來，同你一齊收拾玩具。
3歲嘅小朋友說不，多數真係唔想收拾，常見嘅想法係：「我仲想玩、我未玩完，點解要而家執玩具？點解你講我就要照做？」呢個時候，父母們可以嘗試叫小朋友解釋「點解你唔想執？」3歲嘅小朋友已經有思考能力，父母應該去了解背後嘅原因，否則無法真正解決問題。另外，要提醒家長，因為小朋友年紀仲細，往往無法完整咁表達出自己嘅想法，所以家長們需要有耐性。
除此之外，家長們可以觀察一下小朋友玩玩具嘅時間長短，例如小朋友玩一樣玩具嘅時間大概係25分鐘，父母就可以喺大約22分鐘時引導小朋友去收拾玩具，而喺收拾玩具過程中，仲可以搭配一啲遊戲，例如「闖關遊戲」，都係一個唔錯嘅引導方式。
4~6歲
1~4歲係發展秩序感嘅關鍵期，如果4歲前可以培養到良好嘅「收拾玩具」能力，4歲後應該可以自行獨立收拾玩具。如果小朋友仲未養成收拾玩具嘅習慣，就有可能同父母嘅教育方式有關，例如父母「講得出，做唔到」，最常見嘅情況就係恐嚇言語愈來愈多，但父母根本冇真正去執行恐嚇內容，而令到小朋友覺得「食硬」你。另外，家庭教育方式要一致，舉個例，媽媽嚴格規定小朋友要自己收拾玩具，但爸爸冇，咁都會影響教育小朋友嘅成效。最後提醒家長們：「讚美總會比恐嚇有效。」
資料來源：未來 Family
