自從外國興起初生嬰兒游泳後，好多人認為寶寶游水時嘅感覺就好似喺羊水裡面一樣，會有一種親切感，所以寶寶唔驚之餘仲會樂在其中，對於寶寶嘅發育亦都有幫助。
{adv here}
好多爸媽畀寶寶游水時，都會喺寶寶頸部套上一個水泡，稱為頸圈水泡。呢種嬰兒水泡近幾年引起咗好大爭議，將全身重量放喺頸部，有可能壓迫寶寶嘅頸動脈導致頸椎受傷，或者遮住口鼻導致窒息，稍有不慎就會危及生命安全。
喺2015年，知名嬰兒頸圈水泡品牌 Otteroo緊急回收近3000件產品， 原因係水泡嘅接縫位可能漏氣，有溺水嘅危險。當時總共發生過54宗嬰兒頸圈水泡爆裂事件，幸好並未造成人命傷亡，但已顯示頸圈水泡存在一定風險。
澳洲公平交易委員會OFT針對頸圈水泡做過一項調查，發現以下幾個潛在危機：
1) 頸圈太緊有可能壓迫到寶寶頸動脈，令頸椎受傷
2) 太厚或者太細可能會蓋住寶寶口鼻導致窒息
3) 被塑膠水泡擦傷或導致過敏
4) 頸圈太鬆可能會脫落，令寶寶溺水
5) 水泡有可能漏氣造成溺水
{adv here}
OFT 執行董事 Brian Bauer 表示，嬰兒頸圈水泡原本係用作醫療用途，幫助有先天殘疾嘅兒童進行復康治療，如果使用唔合規範嘅產品，加上使用方式唔正確，會對寶寶造成極大危險。
兩間教嬰兒游泳嘅英國教育機構 Birthlight 同 STA亦曾經指出，除咗上述風險外，嬰兒頸圈水泡仲會對嬰兒嘅身體以及情感發展造成負面影響。寶寶過分依賴頸圈會限制咗佢哋喺運動上嘅發展，阻礙佢哋嘅主動性，對於刺激寶寶生長發育會產生負面影響。而寶寶自己一個喺水裡面冇父母陪伴，亦有可能造成親子關係變得疏離。
其實畀小朋友提早接觸游泳，對於刺激嬰幼兒各方面嘅發展都有好大幫助，所以建議爸媽們可以以傳統方式，用自己嘅身體去輔助寶寶，避免依賴頸圈水泡，可以令寶寶專注返喺游泳本身，而爸媽們嘅帶領可以令親子關係更緊密。
專家建議，如果一定要畀寶寶使用頸圈水泡，必須慎重選擇，使用時家長要全程喺旁邊監督，確保寶寶嘅安全。
資料來源：今日傳媒
