現今每三個小朋友就有一個過重，大家都似乎比較關注過重嘅問題。但專家指出，小朋友太瘦，其實都係健康隱憂。有啲疾病，例如甲狀腺失調、胃酸倒流、進食障礙，都有可能影響小朋友嘅體重增加。仲有一個爸媽們都好熟悉嘅原因：偏食。
{adv here}
幼兒偏食其實好常見，但有啲小朋友會特別嚴重。美國Parents雜誌報導指出，即使喺美國呢種富裕國家，營養不良嘅問題都非常嚴重，因為有啲小朋友只會食雞塊、飲果汁。呢啲小朋友可能攝取好多卡路里，但就無法吸收成長所需嘅維生素同礦物質，所以佢哋容易感冒，精神不振，脾氣暴躁，上課時無法集中注意力。偏食小朋友亦都最容易缺鐵，而缺鐵嘅小朋友會貧血、易攰、出現行為問題等。
過瘦都會導致性晚熟。專家指出，如果小朋友嘅體重過輕，而且過咗15歲都未出現第二性徵，就要諮詢醫生。
如果小朋友雖然瘦，但體重有穩定增加，就唔需要刻意增肥。但如果小朋友體重冇穩定嘅增長，而且有偏食習慣，就有必要加以糾正。
{adv here}
兒童營養學家建議家長應該持續提供有營養、份量充足嘅三餐同小食，畀小朋友自己決定食幾多，唔好逼小朋友進食，但係要限制小朋友攝取垃圾食物。
唔好因為小朋友瘦，就畀佢飲奶昔、食薯條等垃圾食物，企圖將佢「谷肥」。咁做只會令佢哋嘅飲食習慣更加唔健康，仲會增加成年後患上糖尿病同高血壓等疾病嘅機會率。無論小朋友肥定瘦都要養成健康飲食習慣，唔可以因為瘦，就亂咁食垃圾食物。想令小朋友改善偏食情況，可以每餐準備佢鍾意食嘅健康食物，搭配一啲佢平日唔鍾意食嘅食物一齊食。
另外，攝取全脂乳製品，堅果、牛油果等含有健康脂肪嘅食物，將蔬菜、肉類打碎製成濃湯來代替清湯等，都係健康增磅嘅好方法。
資料來源：華人健康網
