葉酸（folic acid）亦稱為維他命B9，係一種水溶性維他命。幾十年嚟 ，孕婦同埋準備受孕嘅婦女都會被建議提前服用葉酸嚟降低初生嬰兒出現畸形嘅風險，特別係喺某程度上可以預防嬰兒大腦同脊柱等出現嚴重缺陷。
{adv here}
{adv here}
喺20世紀90年代初期，美國衛生官員開始建議所有準備懷孕嘅婦女應該每日服用400mcg（0.4mg）嘅葉酸用嚟防預胎兒神經系統畸形。呢種措施被認為係過去大半個世紀中一項偉大嘅公共衛生事件。
但喺一項新嘅研究中，孕婦體內過高嘅維他命有可能令小朋友成年後增加患上自閉症嘅風險。來自約翰霍普金斯大學嘅Daniele Fallin教授就認為，新嘅研究報告並唔係叫全部人暫停補充葉酸，而係要繼續探索補充葉酸嘅重要性。
一個喺巴爾的摩召開嘅自閉症研究會議上，嚟自哥倫比亞大學流行病學同精神病學教授Ezra Susser認為呢個發現有一定嘅合理性，因為其他研究人員都懷疑吸收太多葉酸會出現問題。
喺呢項研究入面，研究人員跟蹤調查咗喺1998年到2013年喺波士頓大學醫學中心出生嘅1391個兒童，大約有100人被診斷出患有自閉症譜系障礙；研究人員亦都有記錄低兒童喺胎兒時期，母體血液中嘅葉酸同維他命B12嘅含量。
{adv here}
佢哋發現有16位兒童嘅媽媽喺懷孕時期嘅葉酸處於非常高嘅水平，15位兒童嘅媽媽喺懷孕時期維他命B12亦處於極高水平。不過呢項研究只係喺有限數據嘅情況下得出結論，始終大部分小朋友係冇患上自閉症。
但係仍然有一啲專家質疑呢項新研究，主要係因為研究結果只係基於一間醫院同埋少量家庭嘅部份數據，亦都冇足夠證據顯示維他命過多會令胎兒大腦發育造成影響。
研究人員強調，呢項研究絕對唔係叫孕婦停止服用葉酸，因為攝取足夠嘅葉酸對於胎兒嘅健康確實有好處，過量先有機會令到胎兒有危險。
資料來源：每日頭條
