長期使用奶樽害處多
1) 增加蛀牙風險
寶寶如果長時間使用奶樽，因為奶粉中含有糖份，糖份喺口腔入面時間耐咗會轉化成酸性物質，從而損害牙齒，形成蛀牙問題。
2) 增加患中耳炎風險
好多時寶寶喺夜晚用奶樽食奶，有部份家長會俾寶寶瞓喺床上食奶，但係咁樣做，奶就好容易喺嘴邊流出嚟，若果流到耳仔入面，就有可能引發中耳炎。
{adv here}
{adv here}
3) 增加「倒及牙」風險
一般正常嘅牙齒係上排包住下排，如果寶寶出牙後依然長期使用奶樽，牙齒會成日咬住奶嘴，導致牙齒生長出現問題，甚至會令到下排牙齒包住上排牙齒。
寶寶幾大適合戒奶樽
就算寶寶有幾依賴奶樽都好，喺半歲之後都要逐步戒除，始終長期用奶樽，弊多過利。
寶寶一般由6個月大就開始加固，呢個時候就可以循序漸進咁教寶寶用水杯飲水，呢個階段家長要有耐性，千祈唔好操之過急。
如何協助寶寶戒用奶樽
1) 用學習杯
學習杯係寶寶由用奶樽轉用水杯嘅過渡產品，市面上有好多種學習杯，有吸管杯、鴨嘴杯等等，佢哋嘅功能都係令寶寶適應奶樽以外嘅水杯。
{adv here}
2) 用水杯
寶寶再大啲，就可以嘗試用水杯飲水，建議家長唔好畀寶寶用陶瓷、玻璃等材質嘅水杯，一來容易跌爛，二來寶寶拎住會比較重。家長可以選用PPSU材質、矽膠材質、或者不鏽鋼材質嘅水杯。
為咗寶寶嘅健康成長，家長要喺適當嘅時候教寶寶用水杯飲水，只要家長用啱方法，寶寶一歲之後，就可以完全戒甩奶樽，轉用水杯啦！
資料來源：壹讀
