
咬字不清係兒童語音發展嘅必經階段,但隨住小朋友嘅成長,就會逐漸掌握所有語音嘅發音技巧。如果小朋友喺五六歲仍然發音唔準確,例如將「雞」講成「低」、「梳」講成「多」,咁就可能有語音學習遲緩或者發音障礙嘅問題。
孩子由幾個月大開始牙牙學語,最初只能夠發出單字,例如媽媽、爸爸,然後隨住成長慢慢掌握各種音素同聲調。不過,音素都有易有難,例如「S」、「Ts」等就可能要四五歲先可以講得正。
{adv here}
發音障礙或者學習遲緩嘅成因有好多,除咗聽覺障礙同口腔結構嘅問題外,例如牙齒排列、上下顎咬合情況異常、兔唇同裂顎等,大部分發音錯誤係由語音聽辨能力欠佳、口腔肌肉活動能力弱,以及口腔動作不協調引起。
聽障會令到小朋友接收聲音有偏差,自然會影響佢哋嘅發音,而口肌結構同控制會直接影響咬字發音嘅學習,例如患有兔唇裂顎嘅小朋友,軟顎嘅活動可能受影響而引致說話鼻音過重。另外,如果兒童喺多種語言環境長大,小朋友嘅早期語音發展亦有可能受到影響,但一般都會喺開始返學後慢慢改正。
{adv here}
臨床上,發音問題一般可以分為3大類。第1類係錯音,例如將「梳」讀成「多」;第2類係懶音,例如將「講」讀成「趕」,而第3類係鄉音,亦都係最常見嘅發音問題,例如發唔到合唇嘅字尾輔音,將「三」讀成「生」。
部分家長可能覺得錯音、懶音可以自己改正,但其實有嚴重發音障礙嘅小朋友, 好多時都唔會自行矯正。結果到小朋友開始返學,甚至長大後出嚟做嘢,咬字發音問題可能會成為別人嘅笑柄,不但影響學習,甚至會令佢哋講嘢冇信心,影響發展同社交能力。
所以,當父母發現子女有發音問題,應該儘早搵醫生同言語治療師做一個詳盡評估。醫生可以排除隱藏病患,而言語治療師可以判斷問題嘅成因同嚴重程度,然後因應個別需要訂立適合嘅治療計劃,幫助佢哋改善咬字不清嘅情況。
資料來源:信報