芷希今年6歲，係一位樣子甜美嘅可愛小女孩，有一日佢喺幼稚園，唔小心整污糟咗同學嘅校服，同學馬上話畀老師知，老師要求芷希當場向同學道歉，但芷希唔肯，仲好委屈咁喊起上嚟。到底點解小朋友做錯事會唔肯道歉呢？應該點樣糾正？
{adv here}
針對呢個問題，首先家長們要諗吓，小朋友係咪真係知道自己錯？家長從小有冇教導小朋友呢種行為係錯？
好多家長都忘記咗，自己就係小朋友人生中嘅第一個老師，小朋友對社會嘅認知、事情對錯、人際關係，個人性格等等，都同家長們從小對子女嘅身教息息相關。
面對小朋友做錯事唔道歉嘅表現，家長可以參考以下做法。
定義所謂的「錯誤」
針對以上芷希嘅例子，老師同同學都認為芷希有錯，但芷希認為自己冇錯，所以先會覺得委屈，呢個就係大人同小朋友溝通上嘅盲點。芷希唔小心整污糟咗同學嘅校服，大人應該即時解釋畀小朋友聽：「點解整污糟同學嘅校服係錯？」明確咁話畀小朋友知呢種行為係錯，正確嘅表現應該係點，而唔係一味要求小朋友馬上道歉。
有時小朋友會回應：「係我唔小心。」，其實唔小心呢句說話已經包含道歉嘅意思，大人冇必要刻意要求小朋友一定要講：「對唔住」、「係我錯」等道歉說話，重點係小朋友發現自己做錯事後嘅「彌補行為」，呢個先係避免小朋友下次再犯錯嘅關鍵。
{adv here}
家長平時要以身作則
平時家長嘅身教，就係小朋友嘅學習榜樣。家長應該建立做錯事要道歉嘅氛圍，例如：「Sorry，媽媽唔小心打爛咗你隻杯！」或者「唔好意思，爸爸唔記得將垃圾分類。」爸媽們要習慣將道歉說話掛喺口邊，同埋要將自己嘅錯誤行為清清楚楚咁講出嚟，最後就要小朋友見到家長做錯事嘅彌補行為。例如，媽媽打爛杯要自己用掃把清理爛杯碎，然後用報紙包住以免割損手；爸爸以身作則將垃圾逐一分類好，咁樣做小朋友先會明白邊啲行為係錯，發現
自己做錯時，應該點樣彌補。
切忌落井下石
當小朋友做錯事，有啲家長會落井下石，其實犯錯嘅小朋友已經覺得非常自責，如果旁邊嘅人再一味責怪佢，落井下石，只會令小朋友更加失去自尊！家長要記住，當小朋友犯錯，最重要唔係處罰同認錯，而係理解佢哋犯錯嘅原因，協助佢改過，避免下次再犯錯。
讚美小朋友 加深小朋友對彌補錯誤嘅領悟
只要小朋友願意彌補錯誤，其實家長唔需要太在意小朋友有冇講道歉說話，因為道歉只係一個儀式。最後呢一點非常重要！當小朋友願意改正，大人應該及時讚揚小朋友，加深佢哋對於彌補錯誤嘅領悟，小朋友得到正面回饋，願意做錯事之後道歉嘅意慾就會更大。
資料來源：優活健康網
