孟加拉一位20歲女子早產誕下一名男嬰之後，隔咗26日又生多一對龍鳳胎，所有醫生包括埋產婦本人都唔知道呢對龍鳳胎嘅存在。醫生就表示佢從醫30幾年都未見過咁嘅事，令人覺得好出奇，好在三名嬰兒都好健康。
{adv here}
{adv here}
來自沙爾沙烏帕齊拉 (Sharsha Upazila) 嘅 Arifa Sultana上個月25日喺傑索爾縣 (Jessore) 附近嘅庫爾納醫院，早產生咗一名男嬰，由於寶寶健康又恢復得快，冇耐就帶咗仔仔返屋企，點知26日後佢又穿羊水，喺今個月22號開刀生咗一對龍鳳胎。
醫生 Sheila Poddar 表示，分娩之前，Arifa根本唔知自己仲陀住雙胞胎，檢查後先發現佢有兩個子宮，第一胎同第二胎分別喺唔同嘅子宮出世，由於手術後冇出現併發症，所以母子3人喺26號已經出院。
{adv here}
傑索爾縣政府首席醫生 Dilip Roy 表示，佢從醫30幾年都冇遇過呢啲案例，仲質疑點解醫院會檢查唔到。Arifa一次過生咗3個小朋友係一件好開心嘅事，但佢丈夫每月只有70美金（約550港幣）嘅收入，經濟狀況唔理想，令佢擔心將來嘅生計。不過爸爸就選擇積極面對仲好開心咁話「我全部小朋友都好健康，係真主賜畀我哋嘅奇跡，我會努力令到佢哋幸福。」
資料來源：ETtoday
