1. 追奶壓力
啱啱開始追奶係人奶路上最辛苦嘅時期。啱啱生完寶寶，本來應該要好好休養身體，但除咗要照顧初生寶寶之外，仲要定時餵人奶，根本就係過住非人生活。
身邊總會有一班三姑六婆特別「關心」你餵母乳嘅進度：有冇奶啫？BB夠唔夠飽啊？點解要補奶粉嘅？為咗追奶已經夠煩，仲要應付埋呢班「熱心」人士，人奶媽媽點會唔崩潰？
{adv here}
{adv here}
2. 塞奶困擾
少奶煩，多奶又煩。當母乳產量開始多嘅時候，乳腺就可能會塞，相信好多人奶媽都試過塞奶。塞奶嘅位置又腫又痛，加上點樣搏命按摩都按唔走啲硬塊，糾纏幾日之後仲好大機會變做乳腺炎，發燒食藥都事少，幾經辛苦先追到嘅奶量仲有可能因為咁而下降返，對媽媽又係另一個打擊。
3. 無自由，失自由
出街嘅時候，時間一到就要即刻趕返屋企或者搵個地方餵奶／泵奶。特別係新手母乳媽媽，2至3個鐘頭就要做一次，完全失去自由，有時把心一橫索性唔出街。而出門就算有育嬰室，好多時候都要排長龍，嗰種脹奶脹到就快爆嘅感覺係人奶媽媽先會明！
{adv here}
4. 胸形變化
一踏上人奶路就註定要接受胸部翻天覆地嘅變化。胸部由細變大之後，當然一開始會好開心身材變得波濤洶湧，但係太大又會覺得好恐怖。另外，經歷咗變大咪咪時期之後，因為寶寶開始加固母乳亦都開始減產嘅時候，之前被撐大嘅胸部會瞬間變細，經歷咗胸部忽大忽細嘅過程之後，胸部除咗鬆弛之外仲會下垂，感覺好似比生寶寶前仲細。
5. 遭人白眼，不被諒解
人奶路係孤獨嘅，可能有人會質疑母乳係咪真係會給予寶寶最好嘅營養。人奶媽媽點解會咁「玻璃心」，其實係因為餵人奶要付出嘅實在太多，聽到其他人嘅閒言閒語，當然會更加難受。
資料來源：每日頭條
