
為咗小朋友嘅健康著想,家長都會苦口婆心咁提醒小朋友記得飲水,亦都會準備一壺水畀小朋友帶返學,但放學後家長就會發現,原來小朋友根本冇飲過!到底點先可以令小朋友自願飲水呢?
{adv here}
無論係大人或者小朋友,補充足夠水分絕對有好處,包括體重、膚質、到排便等生理狀態都會因為攝取到足夠水分,而令我哋嘅身體機能維持健康。其實小朋友自己都明白飲水嘅好處,只係每當有汽水或者其他飲品擺喺面前,就會抵受唔住誘惑。
美國《Fatherly》雜誌建議,想小朋友養成飲水嘅習慣,平時就應該杜絕畀小朋友以有味飲品解渴,畢竟,呢啲飲品不但冇營養價值,仲有可能令小朋友成為糖上癮嘅受害者。
只要記住以下5個簡單技巧,家長們就可以令小朋友主動飲水。
1) 攝取有別:一歲之後,幼兒每日可以攝取240毫升嘅水,兩歲就增加到480毫升,如此類推,一直到9歲之後,養成每日固定飲用約1920毫升水嘅習慣。
2) 遠離有味飲品:小朋友一旦習慣飲果汁等有味飲品解渴,就好難返到轉頭!
{adv here}
3) 營造樂趣:例如家長可以畀小朋友挑選一隻佢最鍾意嘅造型水杯,同時再配上一枝可愛嘅飲管,令飲水變得有趣,成為值得令人期待同開心嘅事。
4) 自動自覺:要令小朋友養成自動自覺飲水嘅習慣,首先必須令小朋友知道水機或者水壺嘅位置,咁樣小朋友想飲水嘅時候,隨時可以自己裝水,唔需要大人提佢哋飲水,就係養成飲水習慣嘅好開始。
5) 打造規律:當小朋友擁有自己嘅專屬水杯,家長就可以開始根據小朋友每日嘅行程,協助小朋友建立固定嘅飲水時間;例如小朋友一返到屋企就要先飲一杯水,或者每次食完飯都要飲一杯水,周末外出時要幫小朋友準備一個佢鍾意嘅水壺,令小朋友知道佢可以隨時隨地補充水分。
資料來源:華人健康網