寶寶大約2歲起就可以開始進行如廁訓練，不過每個小朋友嘅狀況都唔一樣，父母唔需要太心急，要採用適當方法，先可以令寶寶順利學習自己去廁所。
當幼兒養成如廁能力後，喺有意識或清醒嘅情況下就唔需要用尿片，再從午睡開始嘗試唔用尿片，逐步進展到夜晚都唔用，然後，完全戒掉。當小朋友唔再需要用尿片，外出就方便好多，返幼稚園亦都唔需要麻煩老師。
{adv here}
訓練前應有正確心態
幫小朋友進行如廁訓練前，父母應該注意以下6個原則：
1) 觀察記錄孩子狀況
先觀察小朋友用尿片嘅狀況，係一換完就好快又濕返，定係冇即刻濕，一段時間後先有一大泡尿？如果係後者，即係小朋友可以忍尿一段時間，已經適合開始進行如廁訓練。又或者小朋友會主動要求換尿片，因為唔鍾意「濕笠笠」嘅感覺，亦都代表小朋友適合接受訓練。
2) 不用嚴肅態度說話
建議以輕鬆嘅態度去進行訓練，令小朋友喺有安全感嘅氣氛下學習如廁。因為有啲小朋友覺得尿片濕咗先有安全感，對大便小便離開身體會感到失落，需要多啲時間熟悉自己去廁所嘅方式，同埋化解呢種失落感。轉換如廁方式，對於小朋友嚟講，係一種挑戰。
3) 以正面並充滿愛的感情引導
只要小朋友有少少進步，無論成功達標與否，都應該給予讚美；即使學習進展未如理想，父母都要給予安慰鼓勵，避免令小朋友覺得有壓力或焦慮。
{adv here}
4) 訓練要有耐性
畢竟每個小朋友嘅適應能力都不一樣，父母唔應該預設時間表，需要陪小朋友反覆嘗試，要抱住耐心同鼓勵嘅態度。千祈唔好同其他小朋友比較，咁做會增加小朋友嘅心理壓力。
5) 支持小朋友主動嘗試
如果小朋友主動表示想嘗試，父母就應該全力支持，唔好怕麻煩，即使外出時可能有所不便，都要視乎情況同小朋友好好溝通，唔好直接拒絕。
6) 放手讓孩子學習獨立
練習初期，父母難免唔放心，會跟埋入廁所「監督」，睇住小朋友執行晒所有流程先安心。不過，有啲小朋友鍾意「自己嚟」，唔想父母喺旁邊，呢個時候父母就要放手，畀小朋友自己完成，如廁後，再檢查是否有需要調整。
小朋友學習如廁係自然發展，急唔嚟。一般而言，15個月大嘅幼兒，會意識到自己尿尿或便便；18至24個月大會注意到尿片污糟咗，並可以分辨出尿尿同便便嘅差異；24個月大會識得表達大小便嘅需求；30至36個月大會主動要求大小便；48個月大，如廁模式同大人接近。不過，每個小朋友嘅發展狀況都唔一樣，以上時間點只可以作為參考。
資料來源：聯合新聞網
