小朋友開學後就要開始應付排山倒海嘅測驗同功課，父母應唔應該陪小朋友做功課呢？陪嘅話，小朋友會唔會變得太依賴？唔陪又怕小朋友會求求其其亂咁做，到底父母應該點做呢？
{adv here}
不要過度陪小朋友做功課
我哋所講嘅過度陪小朋友做功課係指過度「干涉」小朋友做功課，例如代小朋友做功課，小朋友動不動就問家長點做，求其做完就塞畀家長檢查等。其實過度陪伴會帶來好多問題。
影響小朋友的獨立性
小朋友一遇到難題就會習慣性問家長點做，或者一直問家長佢做得啱唔啱。如果小朋友只要有少少唔識做就會反射性咁立即問家長，代表佢已經出現咗一種思維惰性。家長應該畀小朋友學識自己解決問題，就算係問，都要佢先思考過再問，所以唔建議家長一直坐喺小朋友旁邊糾正錯誤，咁做小朋友會失去獨立思考空間。
另外，家長唔好怕小朋友出錯，錯誤可以刺激佢嘅大腦發展。小朋友做功課遇到問題時嘅處理方式，可以反映小朋友嘅獨立能力，例如佢可以選擇自己上網搵資料，或者問朋友、家長、老師，喺經過思考後，呢啲解決辦法會喺小朋友心入面留下更深刻嘅印象。
影響小朋友的責任感
有啲小朋友會求其做晒所有功課，然後塞畀家長檢查。以呢種態度完成嘅功課會出現好多問題，例如寫錯字，睇錯題目，而每次小朋友改錯後下次依然會犯同樣嘅錯。會出現呢種情況，大概就係因為小朋友對家長形成咗依賴，反正功課都會畀家長檢查，家長叫佢點改就點改，做錯咗都冇咩大不了。但係小朋友應該對自己嘅功課負責任，而唔係家長。
{adv here}
如何令小朋友主動做功課？
好多小朋友做功課嘅積極度都唔高，當家長唔喺佢身邊督促佢，十分鐘可以完成嘅功課，要拖到一個鐘先做得完。所以要小朋友自己獨立做功課，首先要加強佢哋嘅時間管理能力。最好由小朋友安排一個固定時間畀自己做功課，可以玩完先做功課，或者做完功課再玩。過咗一段時間，家長可以問問小朋友滿唔滿意自己嘅安排？時間夠唔夠？需唔需要調整？呢個練習可以幫助小朋友規劃自己嘅時間，亦都可以令佢哋反思自己嘅行為。
當小朋友做功課時遇到問題，家長可以提供一啲線索，小朋友要根據線索去搵出答案，而尋找答案嘅過程可以激發佢哋嘅探索欲同學習興趣。
家長應該扮演什麼角色？
到底家長喺小朋友做功課嘅過程中應該扮演咩角色呢？其實，陪小朋友做功課唔一定要「昅到實」，家長可以同佢哋同時工作，你打你嘅報告，佢做佢嘅功課。咁樣可以營造一個良好嘅學習氛圍，小朋友見到家長咁認真工作，自己都會跟著一齊努力。
資料來源：今周刊
