「媽咪，阿哥蝦我！」當你聽到細B對大B嘅「控訴」時你會點做呢？「锄強扶弱」係好多父母嘅下意識反應，但咁做對大B又公唔公平？到底點做先可以化解矛盾，真正幫到細B呢？
{adv here}
要為細B「出頭」？
由於細B年紀小，往往處於弱勢，所以爸爸媽媽通常都會情不自禁咁懲罰大B，為細B「出頭」。呢個做法唯一優點就係可以儘快終止衝突，但其實弊遠大於利。對於大B，呢種方法欠缺公允，大B被迫屈服於家長嘅威嚴下，只能夠將怨恨埋藏喺心入面，日積月累。而對細B嚟講，呢種方法表面上係一種呵護，但其實剝奪咗佢學習應對衝突嘅機會，長此落去，佢就會變成一個遇到問題就依賴父母幫佢解決嘅人。
由「戰爭」到「和平」5步曲
下次再出現大B欺負細B嘅情況，爸媽們不妨試試以下做法：
1) 觀察
父母唔好心急，先暗地裡觀察兩個小朋友嘅互動，注意佢哋嘅情緒，判斷衝突會唔會令細B身體受傷或者遭受心理上嘅傷害（例如被羞辱、被威脅等），再決定自己有冇必要立即出面干預。如果小朋友間嘅衝突唔算嚴重，就繼續觀察。換個角度睇，細B都需要鍛煉自己嘅心理承受能力同應對衝突嘅能力。
2) 分開
如果父母經過冷靜觀察，判斷為必須出面解決，第一步就係要將兩個小朋友分開，防止佢哋發生肢體上嘅衝突，亦都可以令佢哋冷靜落嚟。
{adv here}
3) 處理情緒
第二步就係處理情緒。發生衝突時，兩個小朋友都會出現強烈嘅負面情緒，包括佔上風嘅大B。呢個時候，關鍵係父母自己唔可以情緒化，要保持平靜。
關於平復小朋友嘅情緒，可以試試呢個方法：坐喺佢身邊，用溫和語氣同佢講：「我見到你頭先好嬲喎（或難過、害怕等），可唔可以話我知發生咩事呀？」當小朋友陳述事件時，父母只要專注傾聽就可以，不作任何評論。咁做，小朋友不但好快就恢復平靜，仲可以學識如何正確地表達自己嘅情緒。
4) 教育
情緒調整好後，就可以開始進行教育。根據發生衝突時嘅具體情境，同佢哋講道理，盡量用提問嘅方式啟發大B嘅同理心，循循善誘，激發起佢對家人嘅愛。角色扮演都係一個好方法：通過角色扮演重現衝突情境，然後引導小朋友去討論有冇其他更好嘅做法。
5) 和好儀式
講完道理後，問大B，係咪應該同細B道個歉？如果大B拒絕，就說明佢內心一定有啲情緒未處理好，父母應該追問原因並繼續處理。對於真誠嘅道歉，細B通常都會接受。之後就要問其中一個小朋友願唔願意抱抱對方？如果兩個小朋友完全自願地擁抱對方，和好儀式禮成，事件就正式畫上句號，兩個小朋友都會安安樂樂，心無芥蒂。
資料來源： Q博士
