做剖腹產嘅媽媽都要面對兩大難題，第一個難題就係要好好照顧開刀分娩嘅傷口，另一個難題就係餵奶。以下係剖腹產媽媽餵哺母乳嘅常見問題以及注意事項。

{adv here}

1) 剖腹產媽媽最好選擇側躺餵奶嘅姿勢，或者欖球式抱住寶寶餵奶，可以避免寶寶身體壓到傷口。

2) 如果剖腹產媽媽要坐喺度餵奶，最好坐喺直背同有扶手嘅櫈上面，唔好坐喺床上面餵，咁樣對腹部肌肉有好處。記得喺身邊放幾個抱枕，支撐住寶寶身體嘅同時，亦都可以好好保護自己嘅傷口，以免發生爆裂。

3) 當護士教產婦正確餵奶姿勢時，爸爸一定要喺旁邊一齊學習，因為出院後，媽媽唔方便彎腰睇寶寶有冇正確地含乳，唔正確嘅話爸爸需要幫忙糾正。

4) 疼痛會影響乳汁分泌，而剖腹產手術後產婦需要服用嘅止痛藥一般都係安全，好少會進入母乳。

5) 剖腹產媽媽要更加勤力餵奶，因為佢哋嘅母乳分泌時間會比順產媽媽遲，要密密餵先可以分泌足夠奶水，滿足寶寶嘅需要。

剖腹產後可以立即餵奶嗎？

剖腹產後可以即刻餵奶。好多產婦認為剖腹產手術中使用嘅麻藥會影響奶水，所以要等寶寶出世幾日後先可以開始餵母乳，但其實呢種做法係錯誤。手術中嘅麻醉藥唔會影響到胸部，而且劑量亦未到達會影響到奶水嘅水平，而且媽媽清醒時麻醉藥其實已經代謝得七七八八。

{adv here}

剖腹產會影響泌乳？

好多媽媽擔心剖腹產會影響泌乳，其實都要視乎情況。如果係因為生產過程中出咗問題，例如胎位不正或者宮縮不順等而採取緊急剖腹產係唔會影響泌乳。如果係擇日剖腹，媽媽冇經歷過分娩過程，泌乳反射就會受到影響，可能到產後兩三日先有乳汁分泌。

剖腹產媽媽應儘早開始餵奶

按照世界衛生組織同聯合國兒童基金會嘅指引，剖腹產媽媽應該喺新生兒剪臍帶後，進行母嬰局部皮膚接觸，回病房後再次進行母嬰裸體皮膚接觸同及早吸吮。雖然剖腹產媽媽唔會好似自然分娩嘅產婦咁快感覺到乳房脹痛，但從寶寶出生開始體內嘅激素就會開始自我調節，但一旦錯過最初畀寶寶吸吮嘅時期，日後餵奶就會比較困難。

資料來源：每日頭條