聽講生完寶寶後食薑會造成血崩，真係咁恐怖？中醫師表示，薑有散風寒嘅作用，可以刺激子宮收縮，幫助排走惡露，懷孕媽媽生完寶寶之後，子宮內膜會持續剝落大約一個月左右，呢個現象就叫做「排惡露」，「產後排惡露」同埋「血崩」係兩回事，以往生完寶寶嘅媽媽一定會飲嘅排惡露秘方「生化湯」，就含有老薑成分。
{adv here}
{adv here}
產後子宮收縮得好唔好，睇排惡露時間就知道
「惡露」係女性生完寶寶後陰道排出嘅分泌物，入面混合咗胎盤碎片同埋胎膜等，我哋可以用惡露排出嘅情況嚟判斷子宮收縮得好唔好。
中醫師表示，一般嚟講，啱啱開始嘅惡露好似鴨血咁大塊、顏色係偏紅或者暗紅，呢個時候唔建議用大量薑、麻油或者酒嚟進補，通常需要等10至14日之後惡露慢慢轉變做淺粉色、淺黃色或者透明，狀態似白帶，先可以開始用上述三種食材嚟調理；如果14日之後仍然有惡露，代表子宮收縮情況未如理想，呢個時候可以食薑、羊肉等等嘅暖宮食材，幫助子宮收縮同埋排走剩餘嘅惡露。
產後調理分4個階段
順產嘅媽媽每一個階段大約7日，剖腹產媽媽腹部多咗一個傷口，觀察同埋修復期比較長，每一個階段大約10日。
{adv here}
第1階段／排惡露：呢個階段嘅重點係排走瘀血同埋補血，建議食紅豆、豬潤、紅糖水等食物。
第2階段／助泌乳：生完寶寶之後氣血會比較虛，加上好多媽媽都會餵人奶，所以可以食多啲補氣、健脾嘅食材，例如黃耆、紅棗、山藥。另外，受到荷爾蒙嘅影響，餵人奶嘅動作本身就可以促進子宮收縮，幫助排惡露。
第3個階段／補氣血：呢個階段以恢復子宮正常機能為主，所以喺調理方面可以補氣血為主，可以開始用薑、酒同埋麻油調理。
第4個階段／強筋骨：呢個階段嘅重點喺補骨，建議加入杜仲喺膳食入面，或者飲八珍湯、十全大補湯等，可以補腎固精血，強健筋骨，防治產後腰酸背痛。
資料來源：每日頭條
