天氣凍嘅時候，飲番杯桂圓紅棗茶，即刻全身暖笠笠！月經來潮時，好多媽媽都會煲桂圓紅棗茶畀囡囡補血。但原來呢種材料同做法都好簡單嘅熱門飲料，唔係人人都適合，飲錯反而會傷身。
1) 常感疲憊
如果係因為經常捱夜工作而覺得攰，多數屬於陰虛火旺體質，通常都會出現瞓得唔好、燥熱嘅情況，亦有可能係本身患有肝炎，有肝火盛、易口渴嘅情況，兩者都唔適宜飲帶溫熱藥性嘅桂圓紅棗茶，以免「火上加火」。
氣血虛弱嘅人，多數身型高瘦，容易覺得攰同四肢冰冷，唔會經常覺得口渴，就好適合飲桂圓紅棗茶嚟補身。
{adv here}
2) 容易經痛
好多女性嚟M時都會飲桂圓紅棗茶補血止經痛，但黃慧娟中醫師提醒，飲之前要先確認自己是否屬於「虛寒體質」。
虛寒體質嘅人，平時容易手腳冰冷，經血顏色呈現鮮紅或淡紅色，經痛通常都唔會太嚴重，飲一杯溫熱嘅桂圓紅棗茶，的確有助舒緩經痛不適。
如果經痛係「寒瘀」或者「濕熱」體質所引起，就唔適宜飲桂圓紅棗茶。寒瘀體質可能有肌瘤或子宮肌腺症，濕熱體質可能有慢性骨盆腔發炎嘅情況，飲桂圓紅棗茶，會加重不適同經痛症狀。
{adv here}
3) 消化問題
經常有食慾不振、腸胃吸收不良或者肚痾、有氣無力、面色蒼白同身型高瘦嘅人，多數屬於「氣血虛」嘅體質，適合飲桂圓紅棗茶養生。患有胃酸倒流或急性胃炎嘅人，就最好唔好飲，因為桂圓同紅棗都含有大量糖份，會刺激胃酸分泌，加重病情。
經常出街食飯同應酬嘅人，容易形成「痰濕」或者「痰火」嘅體質，唔適合飲桂圓紅棗茶，因為甜嘅食物會惹痰，溫熱嘅食物會助長火勢，影響消化功能。另外，平時飲食冇節制，餐餐大魚大肉嘅人，都應該儘量避免飲桂圓紅棗茶，以免加重腸胃消化嘅負擔。
資料來源：每日頭條
