小朋友沉迷玩手機百害而無一利。小朋友正正處於生長發育嘅階段，成日玩手機會嚴重影響佢哋嘅視力，亦都會影響到佢哋嘅睡眠同埋排毒，甚至會有機會患成年人有嘅頸椎病，仲會影響大腦同埋智力嘅正常發展。另外，小朋友長時間用手機玩遊戲，一定會減少咗用言語同其他人交流嘅機會，咁樣會令小朋友變得細膽、唔合群，甚至性格變得固執。
小朋友點解會沉迷玩手機？某程度上，家長要負上一定嘅責任。
1. 家長將手機當成「氹寶寶嘅工具」，每次小朋友大喊，就用手機播歌畀佢哋聽、播卡通片畀佢哋睇，日子耐咗會令小朋友對手機有咗依賴性。
2. 小朋友稍為大個啲，家長為咗唔洗咁操心，怕小朋友煩住自己，會影響自己嘅生活或者工作，於是就比部手機小朋友玩。
3. 父母喺屋企都成日用手機，做咗一個錯誤嘅示範畀小朋友睇。有啲年輕父母由朝到晚都機不離手，食飯、去洗手間、瞓覺都唔會放低手機，除咗瞓覺會合埋眼之外，其餘時間都會金精火眼望實部手機。
到底點樣先可以避免小朋友沉迷玩手機，或者幫佢哋戒甩「手機癮」呢?
1. 家長必須以身作則
家長儘量唔好喺小朋友面前玩手機。如果父母都控制唔到自己玩手機嘅頻率，點樣去要求小朋友唔玩手機呢？家長喺屋企一定要做個好榜樣，無論自己有幾「手痕」，都要儘量減少玩手機嘅次數。
2. 轉移小朋友嘅注意力
當小朋友扭計要玩手機遊戲嘅時候，父母可以用佢哋鍾意玩嘅玩具代替手機，或者陪小朋友一齊玩，亦都可以帶佢哋出去外面玩，例如去遊樂場、公園等呢啲多小朋友嘅地方，嚟轉移佢哋嘅注意力。
3. 幫小朋友制定玩手機嘅制度
家長可以限制住佢哋使用嘅時間同次數。例如每日只可以玩兩次，每次只可以玩5至10分鐘。如果小朋友有遵守，就可以表揚吓佢哋；如果冇遵守，一定要強制佢停止使用手機，但係唔好打或者鬧小朋友。家長幫小朋友制定好規條之後，一定要嚴格執行，就算小朋友扭計唔肯，甚至大吵大鬧都要堅守原則。如果父母作出妥協，就會令小朋友將哭鬧作為同父母對抗嘅武器。
資料來源：每日頭條
