好多家長擔心小朋友做錯事會令佢哋受到傷害，往往都會忍唔住要立即糾正佢哋，但打罵已經不合時宜，於是「講道理」就成為咗好多父母嘅管教方法。雖然爸爸媽媽講道理嘅原意係好，但對小朋友來講都只係包裝過嘅批評同責備，唔會有好嘅效果。
{adv here}
{adv here}
舉個例，小朋友唔記得拎功課返屋企，家長就會話佢粗心大意，然後越講越遠，甚至將小朋友以往嘅過錯舊事重提。雖然只係勸告，冇大聲咁批評佢，但家長所講嘅嘢都直指小朋友有錯，令到原本有悔意嘅小朋友越聽越反感，完全聽唔入耳。
又例如，當小朋友提到佢班入面某位同學嘅行為有幾過分嘅時候，好多家長都會提醒小朋友：「咁你係咪做得好過佢？你唔好學佢」家長經常會將其他人嘅問題拉返去小朋友身上，習慣將佢同其他人比較，或者家長咁做只係想借呢個機會教導小朋友，但就令到本來只係想同爸爸媽媽開心分享嘅小朋友即刻覺得冇癮。
{adv here}
其實小朋友同家長談論其他人嘅時候，父母只需要將問題聚焦返喺其他人身上，令家長同小朋友都可以輕鬆詳談一下自己嘅觀點同諗法。就算小朋友遇到困難，主動向父母求助、想知道問題應該點解決，父母都要先聽聽小朋友嘅諗法，充分接納、同理小朋友嘅情緒後，先講出自己嘅意見畀小朋友參考，而唔係去限制同批評佢嘅缺點同選擇，呢種輕鬆冇壓力嘅交流方式，先會令小朋友更加容易接受爸爸媽媽嘅觀點同建議。
其實教育，重點唔係父母同小朋友講嘅內容，而係小朋友是否會聽入耳同接受意見。想小朋友聽話，家長應該先學識聽小朋友講嘢，放低「灌輸小朋友正確概念」、「糾正小朋友錯誤諗法」嘅觀念，試試喺講道理之前「聽吓小朋友點講」，咁樣父母嘅教導先至對小朋友有幫助。
資料來源：華人健康網
