準媽媽喺懷孕期間，最怕就係感冒、發燒，或者患上其他需要食藥嘅疾病，擔心藥物會傷害到腹中寶寶，但原來除咗藥物對胎兒嘅影響，孕婦發燒同自閉症都有關係。美國有研究發現，準媽媽喺懷孕期間發燒，會增加胎兒罹患自閉症嘅機率。
{adv here}
美國紐約哥倫比亞大學（Columbia University in the City of New York）嘅首席研究員Mady Hornig博士表示，研究團隊喺1999至2009年之間，一共收集咗喺挪威出生嘅近10萬名兒童嘅資料，時間長達10年，同時亦都記錄低媽媽喺懷孕期間，有冇罹患感冒、流感，同有冇服用過乙醯胺酚（acetaminophen）、布洛芬（ibuprofen）等退燒藥物。
多年後嘅研究結果發現，呢群小朋友當中，有接近600人被診斷患有自閉症。孕婦如果喺懷孕初期發燒，生出來嘅寶寶自閉症發病率為34%，如果係懷孕中期發燒嘅話，寶寶自閉症發病率會增加至40%。
{adv here}
而且孕婦發燒嘅次數越多，小朋友患上自閉症嘅風險都會隨即增加。喺懷孕第12周後，孕媽媽發生1~2次發燒時，自閉症嘅風險係1.3倍；如果發生3次或以上，小朋友患自閉症嘅風險會高出3倍以上。
Mady Hornig博士表示，從研究中可以得知，當媽媽懷孕期間受到感染，以及體內對感染嘅免疫反應，對自閉症嘅發病有影響。雖然仲未可以確定真正嘅原因，但科學家認為，可能係孕婦發燒時體內嘅病毒，會阻止正在發育胎兒嘅大腦細胞成長，而導致胎兒大腦成長不正常，就係造成自閉症嘅其中一個原因。
Mady Hornig博士建議，孕婦應該注射預防流感針來預防懷孕期間發燒，降低小朋友患上自閉症嘅機率。
資料來源：今周刊
