隨着時代嘅改變，親子關係亦都發生咗好大轉變，以往由家長話晒事，小朋友冇得「say no」嘅舊式親子關係，變成現今社會平等又和諧嘅親子關係。
{adv here}
{adv here}
但係亦都有唔少家長唔適應呢種變化，係都要「擺吓款」，就算做錯事都唔會承認，驚冇面，但係咁樣做反而會破壞爸爸媽媽喺小朋友心目中嘅型象，甚至影響佢哋之間嘅關係。
今日就同大家探討吓點解家長做錯事都要同小朋友道歉。
1. 避免對小朋友造成二次傷害
小朋友被父母冤枉嘅時候已經好委屈，有啲家長發現自己做錯咗嘅時候唔單止唔會道歉，仲會轉移話題或者當咩事都冇發生過。
小朋友冇能力反抗強硬嘅父母，所以只好屈喺心入面。冤枉小朋友已經對佢哋造成傷害，唔認錯嘅話就等於傷害小朋友多一次，咁樣會為小朋友帶嚟童年陰影。
2. 教小朋友勇於承擔
爸爸媽媽要以身作則，因為父母係小朋友學習嘅模仿對象，如果做錯事唔道歉小朋友就會學識逃避責任。教識小朋友是非黑白比自己嘅面子重要得多。
3. 教小朋友互相尊重
就好似爸爸媽媽會寬容小朋友嘅錯一樣，小朋友對爸媽嘅錯誤都會好寬容。當父母做錯事後道歉，小朋友就會覺得同爸爸媽媽關係係平等同埋被尊重，小朋友同樣會尊重同體諒返父母。
{adv here}
如果父母勇於承認自己嘅錯誤，小朋友就會更加信任父母，對父母嘅教導都會心服口服。
4. 改善親子關係
家長好多時都會無意中傷害到小朋友，就好似鬧同打佢哋嘅時候都冇意識到咁樣做係唔啱，就係因為當初佢哋嘅父母都係咁樣管教佢哋。
爸媽可以話畀小朋友聽「其實我哋原意唔係咁樣，爸爸媽媽係愛你嘅，但只係用錯方法，依家同你道歉。」
溫馨和諧嘅家庭入面，爸爸媽媽同小朋友既係親子關係，又係朋友關係，千祈唔好因為小朋友仲細，就忽略咗佢哋嘅感受。
資料來源：每日頭條
