青少年行為問題好可能同父母出現抑鬱情緒有關。外國研究發現，當媽媽喺子女小學階段出現抑鬱症狀，子女長大後好容易出現不良行為，食煙或者吸毒比例都高兩倍，可能因為喺佢哋出現情緒問題需要協助時，家長提供唔到應有嘅指導同支持而引起。
{adv here}
{adv here}
媽媽抑鬱 青少年行為偏差高3倍
網絡雜誌《兒科》刊登咗一份來自加拿大渥太華大學嘅研究，研究者由1994年起用咗15年時間追蹤2900幾對母子，發現如果媽媽曾經喺子女6至10歲嘅時候出現抑鬱症狀，青少年出現食煙同埋食大麻嘅比例都比其他人多兩倍，飲酒比例高1.4倍，使用迷幻藥嘅比例更高出三倍。
精神科醫生表示，唔開心唔健康嘅父母唔可以好好照顧自己，亦唔可以滿足子女嘅需求，咁樣好容易令到處於發展自我階段嘅子女缺乏安全感、感到被忽略同埋過度敏感，好容易產生自我懷疑嘅自我形象，子女唔開心嘅比例就自然高，佢哋將來嘅行為就更加容易有偏差。
{adv here}
正確教導小朋友 放大優點、縮小缺點
無論係父母或者老師，都建議搵出小朋友嘅優點同埋多啲鼓勵，將優點放大缺點縮細。例如，改考試卷嘅時候，歐美嘅老師通常會畀小朋友睇到佢哋答啱嘅部份；而亞洲國家就會用扣分制嚟呈現，強調「你錯喺邊」，就會從小影響小朋友嘅思想模式同埋對自己嘅睇法，甚至開始過度自我要求同責備。
父母喺日常生活中有好多需求同責任，可能會因為自己壓力太大而變得抑鬱，導致無法給予小朋友正向回饋同埋滿足子女心理上嘅需求，如果發現自己或者子女有抑鬱傾向，都應該及時尋求專業協助。
資料來源：華人健康網
