好多小朋友1歲幾，家人都仲會煲粥俾佢食，而且一定要餵，一嚟速度快，二嚟事後唔需要清理現場，慳水慳力。老一輩仲有另一個理論，就係小朋友自己食飯會食唔飽，未到下一餐就開始肚餓。呢啲代代相傳嘅觀念雖然有效，但往往會對孩子嘅發展有負面影響。
一般而言，過咗1歲嘅小朋友，應該開始練習自己食飯。其實呢個時期嘅小朋友好鍾意自己食嘢，初初小朋友會食得比較少，但經過一段時間嘅學習，孩子一般都會學識自己用匙進食。1歲幾係訓練孩子自己食飯嘅最好時機，錯過咗呢個時期，訓練會比較難。
{adv here}
下面就介紹一下小朋友自己食飯嘅好處：
1) 培養孩子獨立
爸媽們應該有注意到，寶寶開始識坐、識爬之後，變得越嚟越有主見，好多嘢都想自己決定，想要有自主權，如果父母唔聽，寶寶會用發脾氣或者唔合作嘅方式嚟抗議。而俾寶寶自己進食，正係俾孩子感覺自己係一個獨立個體嘅好方法。
再者，如果唔想小朋友長大後變成茶來伸手、飯來張口嘅王子公主，要從小事開始訓練孩子，自己完成能力範圍所做到嘅事，而食飯，可以係父母嘗試放手嘅第一步，開始培養孩子獨立。
{adv here}
2) 發掘不同的感覺經驗
寶寶喺仲未太識用餐具嘅時候，會經常直接用手拿食物，食到成面成嘴都係。當父母見到小朋友用手拿食物，甚至拎嚟玩，通常都會無名火起，認為孩子食飯唔專心，掛住玩。但研究顯示，當孩子用手拿食物嘅同時，亦都係感覺食物嘅溫度、手感，正在開發感官嘅時刻。透過自己進食，可以擴展小朋友嘅觸覺、味覺、視覺經驗。
3) 肢體協調與配合
孩子自己食飯係一個好復雜嘅活動，需要小朋友手、眼、嘴嘅高度協調，同時亦需要上半身多組肌肉嘅配合，呢啲協調同配合都係受大腦指揮，所以自己食飯係一種早期教育。
由家人餵小朋友食飯，雖然比較快，亦唔需要善後，但無意中，就剝奪咗孩子早期學習嘅機會。但要平心靜氣面對小朋友食到一天一地都係，真係唔容易，家長嘅容忍度要好高，建議爸媽們先從簡單嘅食物開始，免得試幾次就放棄。另外，要提醒爸媽們，喺孩子進食嘅時候要小心，避免鯁喉，發生意外。
資料來源：商周.com
