好多寶寶3~4個月大時，就開始唔會一鼓作氣咁飲晒成支奶，而係斷斷續續咁飲，量亦都比之前少。呢種情況醫學上稱為「生理性厭食期」，特徵係寶寶依然正常發育，活力充沛，只係奶量暫時減少，通常經過一段時間，再加上相關改善措施，厭奶情況就會獲得改善。

{adv here}

4招應付厭奶期

1) 安靜狀態下餵奶

各種聲響或者身邊有人行過都會令寶寶分散注意力，停止飲奶。所以，餵奶時最好喺一個安靜嘅房間進行，關掉電視、音響，餵奶嘅人手機唔可以跟身，家人唔好喺寶寶身邊走動，畀寶寶專心飲奶。晚上飲奶時，將室內光線校得柔和啲，亮度適中。

2) 飲奶前讓寶寶安靜下來

呢個階段嘅寶寶，對世界充滿好奇，開始變得好動，所以餵奶前半小時，要令寶寶慢慢安靜落嚟，避免同寶寶玩得太興奮，到咗食奶時間，就會好快進入狀態。

3) 餵奶時眼神要有交流

首先媽媽嘅情緒要放鬆，如果媽媽緊張、焦慮，寶寶會感應到，自己都會緊張埋一份，影響食奶。如果餵奶嘅時候，媽媽同寶寶可以保持平靜溫和嘅眼神交流，寶寶會更加專注。

{adv here}

4) 改變餵食方式

媽媽可以採取較為隨性嘅餵奶方式，唔需要嚴格按照時間表餵奶，以少食多餐為原則，等寶寶想食先再餵。可以通過玩遊戲消耗寶寶嘅體力，例如按摩、肢體活動等，當佢嘅精力耗盡，自然會覺得肚餓，進食的情況都會獲得改善。

如果寶寶雖然厭奶，但精神好，體重增長正常，家長們就唔需要擔心。但如果厭奶時間超過1個月，同時體重冇正常增長 (出生第1~3個月每月約增加700~800克；第4~6個月每月增加600克)，父母就要注意，有可能係由疾病引起嘅厭奶，應該帶寶寶就醫。

資料來源：Q博士